Drive Learner

香港學車之旅 The journey of a Hong Kong drive learner

有人問，係邊到影呢張相。答案：元朗工業區某停車場

基本資訊

起始日期：2021年12月
畢業日期：2023年3月
合計歷時：16個月
操車歷時：6個月
獲得牌照：1 2
路試次數：共3回

天光道 12/2022
油塘 2/2023
油塘 3/2023

學車節數：36 + 18 + 8 (45分鐘為一節)
師資類型：私人導師
學費合計：港幣$25,970 (考試車租、考試鐘、日常節數)

時序

2021年12月 - 排隊入表，筆試被編2/2022
2022年2月 - 筆試暫停
2022年5月 - 筆試合格，路試被編12/2022
2022年12月 - 挑戰天光道失敗，乙丙雙失
2023年1月 - 搶快期成功，油塘 2/2023
2023年2月 - 挑戰油塘失敗，乙丙雙失
2023年2月 - 搶快期成功，油塘 3/2023
2023年3月 - 挑戰油塘成功
2023年3月 - 排隊入表，換取 P 牌
2023年3月 - 補鐘
2023年4月 - 購入二手車，正式享受揸車日子

前言

讀書時候既自己係住九龍，返工返學都係九龍，個一刻真係無乜需要自己揸。直言一句，坐的士平過，方便過自已揸。車，唔合符當刻既成本效益。隨著年紀漸長、家庭轉變、工作轉變、香港轉變、世界轉變…… 又變得有理由要學，有理由要去擁有。就係咁，一個對汽車同駕駛 0 認識既人，就學始香港學車之旅。

本篇內容純粹以個人角度分享自身經歷，沒有對與錯，什麼應該不應該，更沒有什麼與國家安全有任何關聯。

經歷

[2021年12月到2022年5月] - 筆試

由報名到筆試，讓我省略一千字，因為都不在乎排隊幾粒鐘，操題幾百條。

[2022年5月到7月] - 搵師傅

搵師傅。由第一步自己排隊入表，某程度上都已經係半決定左唔搵駕駛學院。我承認，別人既成功的確會係我既直接抄(參)考既策略。所以問左幾個朋友。

朋友 A

棍VAN 1 Take Pass，師傅多數以強烈型式提醒行車時沒有做到的事項。朋友個人覺得師傅係好強烈既，佢識我多年，知我唔 X 得，但都建議我搵佢，因為佢 X 得你時，佢係為你好，X 得你既野，你唔改的話，肥得。同時，師傅為左同學，提供你意想不到既學車時候，全天候為你服務。

朋友 B

棍VAN 2 Take Pass，師傅唔 X 人，有耐性，第2次跟佢就PASS。朋友都係識左我多年，深明我唔 X 得，建議我可以一試。

搵師傅過程

我聯絡過朋友A既師傅，師傅報價同朋友A學車時增加左唔少，而且同網上可得既資料對比下，佢每節既時間比我認知既 45 mins少。考量過財力後，我放棄，因為我窮。之後，就透過學車公司搵朋友B既師傅。學車公司既報價，我承擔得到，每節 45 mins，唯一既問題係學車公司話要等師傅覆有無期。同我諗既一樣，學車公司話該被點名的師傅無期，而另一師傅有期。以下將以 "MY師傅" 專稱。

我自己知自己學習能力，所以希望可以早少少學車。"MY師傅" 解說：12 月考，唔洗咁早，9 月再睇睇。自己唔識，就只好信人，所以 7 月之後就等，等到中秋過埋，去中國國慶之前，就迎來第一次既 "邂逅"。

天光道篇

[2022年9月到12月]

"MY師傅" 以我既年齡同佢對比之下，算後生仔黎。頭幾堂係九龍塘講下原理，講下物理，係個場圍圈走走。由第一堂起，頭幾堂都相隔 8 到 10 日。以呢個間距，真係好快就12 月……。佢有承諾過，到考試月，會比多D期我。又返到去個句：自己唔識，就只好信人。

去到11月，師傅就開始有火了，雖然都係溫和既 X，但我係好唔受 X 的。我既信念係：

「如果 X 完就會識，咁日日 X 就得，唔洗學，唔洗考。」

有一日，佢 X 完我，我就唔再忍口，還拖。個晚九點完左堂，我地係架VAN 上 "討論" 左半粒鐘，最後仲坐埋架 VAN 去左另一區 (近佢返屋企之餘又近我坐巴士返歸)。其間有講過呢二句：

「我開始明白點解巴士寫住行車時請勿與司機交談。我揸住車，你話我我都聽唔明。」

「我唔會換師傅，你覺得教我唔到，你可以換學生，你叫公司轉另一個師傅比我。」

最後，佢無唔比期我，我又無換師傅。又返到去個句：自己唔識，就只好信人。

過後既日子，師傅都轉變左。唔再 X，停左車時，大概以：我講左你聽要咁咁咁，你要合格就要咁咁咁。記得要咁咁咁。唔好咁咁咁。

(呢刻好感受到溝通既重要。至於點溝點通，真係人夾人。大家努力！)

而佢都履行承諾，考試月比足期我。

去到考試果日，我覺得應試既野，要講既師傅都講左。緊張，路面經驗不足，無疑係問題既出處。36 節，換黎乙丙雙失。

L位泊車，次次練都係界內，唔係次次四四正，但次次入柜。結果，考試當日，左後轆踩少少界。
出試場，轉右。已先望右，再望左，再望右，無車，先出車。
點知，一鬆手制就被踩停。原因，右手邊 "的哥" 係個鈄上既頂標左出黎。官話，佢有優先使用權。只好怪自己路面經驗不足。
三手軚調頭，唔係順，但都叫調到。去到果日，第一手之後，對面線砵左我一下。嚇左一嚇，手腳唔協調，扭唔夠，又望少左二眼左鏡，就點到壆，仲要五手先轉返出去。

油塘連環篇

[2022年12月到2023年2月]

搶到快期後，搵 "MY師傅"，佢又夾到期喎，咁就繼續啦。自上年 (天光道篇) 爆左次樽之後，相處上，係夾到既。

前前後後操左18節，日日都係個幾條線。有時有機會轉二個塘 (九龍塘去油塘或者油塘去九龍塘)，雖然唔係考試路線，但係我眼裡面，呢個係好好既路面實習機會，練下轉波、拖波、CUT 線。

到左二月，考前一日，緊張，又返黎了。再一次乙丙雙失。

S位泊車，練左20次，次次都得，次次入柜。結果，考試當日，左後轆點到壆，完。
出左試場，去到一個燈位，有一個車位距離，遇過同樣情況，我都係平穩照過。當下望一望個官，一緊張，雙腳就不自然地煞車了，停左係黃線上，完。
三手軚調頭，成功。不過，平日既三點，一大群學生放學，又有家長車，係一個挑戰黎。

反思是次結果：練，我覺得練夠。反而緊張既情緒管理未做好。

[2023年2月中到3月頭]

二月中雙失後，再一次始力搶快期。搶到三月頭考。唔知好彩定唔好彩，又係油塘，再一次，搵 "MY師傅"。路，同上次一樣，操到熟了。最後操左 8 節 (4 日)。

考前一日，有路段雙線雙程突然有臨時交通管制措施。真係，計劃趕不上變化……

為左無咁緊張，網上搵下有乜方法。其中一個說法，食少少糖，甜野有利減壓。因此，我就買左罐利口樂，食左二粒先開車。

考試當日，係早上時段。雖然有臨時交通管制措施，斜路起步一刻有望鏡，見到有架私家車抽上黎 (抽上黎係我面前 U Turn)。好在及時自己踩停。

結果，有驚無險：

合格

我無信錯人

師傅，感謝你，我知我係難搞／教既。

[2023年3月之後] - 後續

換 P 牌過程就下刪一千字。

至於，買車，補鐘等等既故事。留待甩P 後，有機會再同大家分享。

部車到手後既呢一個月，盡量日日實踐。
暫時已經過路段：屯公、元公、大欖、新界環迴、吐露港、大埔道、尖山隧道、西九龍公路、昂船洲大橋、青衣南橋、汀九橋、荃錦公路、北大嶼山公路、機場南環路

常見問題

問：點解考棍波？
答：個刻對汽車0認識。純粹單純以成本效率去諗，一個價錢，4個牌。

問：有無用咩模擬器、家中練習？
答：有。Simulation Games - Steam - City Car Driving ＋ G923 方向盤。個人覺得只有助練扭軚，轉波。極力子、望鏡，無幫助。

問：有無後悔考棍波？如果可以再選過，會唔會轉自動波？
答：唔會。第一次失敗後，師傅有問過要唔要轉。我個人比較固執 / 堅持，所以一直無轉自動波。回歸現實，人生第一部車，係自動波。係買車個刻，我無堅持。

問：有無諗過搵駕駛學院？
答：有。特別係第一次失敗後。駕駛學院 12/2022 覆我，同學失左手，當刻報名最快排到 1/2024 考 (係一年之後！)。所以，首次失敗後無改投駕駛學院。而搵街師傅既初衷係：以最直接既方法去吸收路面經驗。

問：點解唔轉師傅？
答：信，係其中一個好大既原因。再者，每次唔合格都有反思一下係咩野原因。
自身相信係自己問題多，轉師傅唔一定解決到問題，反而會增加更多不穏定因素。
另一個諗法係，"MY師傅" 滿足到我心目中對師傅既要求：

我要佢教我相關既知識
我要同佢溝通得到之餘，無太大壓力
我要佢係我揸車既時候，保障到我既安全，佢既安全，荷包君既安全
佢要俾到足夠吸收經驗既機會，包括俾到期我、同埋唔好廿四七印住個極力子、煞車
佢要認可我呢個學神，借架車，以師傅身份讓我可以考試
我無發現佢呃我。例如：呃期、呃鐘、呃錢、放飛機等等
承諾，有對現

問：快期？
答：改抽籤制前，全自己搶，無搵代理。

參考過既資料

運輸署《道路使用者守則》

YouTube

試場路線片就睇過好多，睇下就夠，落場切佢，最直接，最清楚。去到考前一晚，條路到考個刻可以有好大變化，而片，睇黎睇去都唔會變。

Computer Simulation

結語

同其考試一樣，考試考知識之餘，亦考驗你個人既運氣。考官、天氣、行人、動物、其他道路使用者，一系列不可抗力既因素，都會影響你既結果。
唔合格唔一定係你手車屎，合格亦唔代表你滿師。合格只代表符合法例要求。引用師傅一句：

「攞到個牌先係真正學車既開始」

各位師兄師姐，多多包涵。

Page updated

Google Sites

Report abuse